Fasihi Simulizi kama Nyenzo Muhimu katika Taaluma ya Kitabibu (Afya)

Abstract

Makala haya yanakusudia kueleza jinsi fasihi simulizi ilivyo nyenzo muhimu katika taaluma ya kitabibu kwenye uelimishaji wa jamii na kutahadharisha kuhusu magonjwa Kama vile UKIMWI, UVIKO-19, Kaswende, Kisonono, Hepatitis B (Homa ya Ini B), Saratani, Kifua kikuu na Malaria. Aidha, yatajenga msingi wa ushirikiano baina ya wanataaluma wa Fasihi simulizi na wataalamu wa sekta ya afya katika utekelezwaji wa mpango wa Sera ya maendeleo na ustawi wa jamii. Si hivyo tu, bali yatasaidia kutanua wigo wa taaluma ya fasihi kuanza kutoa mwanga kwa wanataaluma na wadau wote wa fasihi simulizi kuzimulikia taaluma mbalimbali zilizopo kwenye jamii na jinsi zinavyoweza kuhusiana na fasihi katika ustawishaji wa maendeleo ya jamii husika. Pia kuitazama fasihi simulizi kwa jicho jipya linaloendana na kipindi tulichonacho cha maendeleo ya sayansi na teknolojia. Vilevile katika kuutazama mustakabali wa lugha yetu adhimu ya Kiswahili na fasihi yake kwa jumla, tunataraji kuona ushirikiano thabiti kati ya sekta ya afya na fasihi simulizi katika utoaji wa elimu zihusuzo kinga na afya kwa jamii ya nchi zote za Afrika Mashariki.