Changamoto za Kutafsiri Matini za Kiutamaduni katika Jamii Ulumbi

Mifano kutoka Tafsiri ya Majina katika Matini za Kitalii

Abstract

Makala haya yanahusu changamoto za kutafsiri matini za kiutamaduni katika jamii ulumbi kwa kutumia mifano ya tafsiri ya majina katika matini za kitalii nchini Tanzania. Jamii ulumbi kama anavyoeleza Msanjila na wenzake ni jamii inayozungumza lugha zaidi ya moja kwa ajili ya mawasiliano na dhima nyingine katika jamii. Kwa hiyo, jamii ulumbi ni jamii ambayo kwayo kuna lugha zaidi ya moja ambazo hutumiwa na wanajamii katika mawasiliano na shughuli za kila siku. Lugha hizo zinaweza kuwa tofauti katika hadhi na dhima yake ndani ya jamii husika. Lengo la makala haya ni kubainisha changamoto zinazojitokeza katika mchakato wa kutafsiri majina ya kiutamaduni katika jamii ulumbi, kubainisha mchakato wa kutafsiri matini za kiutamaduni katika jamii ulumbi, na kutoa mapendekezo ya mikakati ya kutafsiri matini za kiutamaduni ili kuhifadhi ujumi wa kisanii na ujumbe uliokusudiwa katika jamii. Makala haya yanaonesha kwamba, majina, maana na ujumbe unaobebwa na majina ya kiutamaduni hueleweka ndani ya jamii mahususi. Kwa hiyo, changamoto za kutafsiri majina yaliyofungamana na utamaduni wa jamii yanatokana na tofauti za kiutamaduni ambazo huibebesha mzigo mzito lugha inayounganisha jamii hizo.